من أشهر وأفضل علاجات حب الشباب هي حبوب الايزوتريتينوين، المعروفة كمان باسم الروأكوتين أو الأكوتين

بالانجليزي اسمه

Isotretinoin   أو   Roaccutane   أو   Accutane

من المعروف ان الدوا ده بيتاخد في حالات خاصة ولازم… لازم متابعة الدكتور طول فترة العلاج، مع عمل تحاليل دم كل فترة.

كل ده لأن الدوا له أثار جانبية كتيرة.

في بعض الحالات، ممكن  حب الشباب يختفي تماما بعد استخدام الدوا لمدة شهر أو اتنين.  وساعتها حتكون عايز تبطل الدوا.

ايه الضرر؟

أقول لك.

كل اللي استخدم الايزوتريتينوين عارف ان الجرعة اليومية ليها طريقة حسابية معينة، وان العلاج بيستمر تقريبا 6 أشهر.

الأهم بقى ان حساب الجرعة بيعتمد كمان على اجمالي الكمية اللي اتاخدت على مدار فترة العلاج.

مثلا…

فلنفترض انك بتاخد 40 مج في اليوم وانك بدأت العلاج من 3 أشهر (يعني 90 يوم)

معنى كده انك أخذت لحد دلوقتي 3600 مج اجمالي (اضرب 40 في 90).

الدراسات بقى أثبتت ان الكمية المثالية اللي بتخلص على حب الشباب بشكل نهائي بتكون ما بين 8000 و 16000 مج اجمالي.

وبالتالي، ال 3600 مج اللي انت أخدتها لحد دلوقتي لسه كمية صغيرة جدا ومش حتدي نتايج مثالية. يعني ممكن طبعا حب الشباب يقل فترة، بس احتمال كبير قوي انه يرجع.

تخيل انت بقى… بعد ما عانيت من الأضرار الجانبية للدوا ده لمدة 3 أشهر كاملة، تلاقي الحبوب ظهرت تاني. أكيد حاجة تنرفز!

الحل المثالي انك تناقش رغبتك في التوقف عن الدوا مع طبيبك، احتمال يكون عنده اقتراحات تعجبك.

مثلا، لو عايز توقف الدوا علشان زهقت، ممكن الدكتور يزود الجرعة اليومية علشان يقلل الوقت الإجمالي وتخلص أسرع.

أو لو تعبت من الأضرار الجانبية ممكن الدكتور يقلل الجرعة علشان تقدر تستحمل وتستمر في العلاج.

ماتنساش… السبب الأصلي اللي خلاك تبدأ الدوا… حب الشباب اللي تعبك نفسيا وزهقك وماكنش في حاجة خالص بتعالجه!

ناقش الموضوع مع الدكتور قبل ما تاخد قرارك النهائي.

ودمتم بصحة وجمال.