عدنا!

معلش

اتأخرت عليكم كتير.

الفترة اللي فاتت حصل تغيرات مهنية وشخصية كبيرة قوي خلت الكتابة بشكل منتظم زي زمان صعبة قوي.

بس الحقيقة موقع البشرة دوت كوم طول الوقت في بالي. من ناحية كنت بستمتع جدا بالكتابة هنا والتفاعل معاكم والاجابة على اسئلتكم. ومن ناحية تانية لأني مقتنعة ان دوري كطبيبة اني أشارك كل الناس في المعرفة اللي ربنا أكرمني بيها في مجال تخصصي.

كنت عارفة اني راجعة راجعة ان شاء الله. بس امتى؟ وأخيرااا الأمر استقرت بشكل كافي وحقدر أكتب من جديد!

المرة دي قررت أسلوب الكتابة يكون مختلف شوية. المقالات حتكون أقصر من الأول – علشان أقدر أداوم في الكتابة، وعلشان كمان ماتزهقوش 🙂 لكن حتفضل برضو مبنية على معلومات طبية وعلمية سليمة ومؤكدة. ده كان الهدف الأساسي اللي خلاني أبدا الموقع ده من الأول. في وفرة في المعلومات الخاطئة على النت من مصادر لا هي طبية ولا هي علمية وكتير منها مضر. موقع البشرة دوت كوت بيحارب الظاهرة دي.

قولوا لي رأيكم – بتفضلوا الكتابة بالعامية زي كده، ولا الفصحى زي كل مقالاتي اللي فاتت؟

وعايزني أكتب عن ايه؟

شكل الموقع الجديد عاجبكم؟

ابعتولي اقتراحاتكم وأسئلتكم هنا أو فيسبوك أو تويتر أو ايميل.

أشوفكم في المقال الجاي.

د. حنان طه